民行借錢比較積極

祖國突然加息已經估唔到,A股不跌反升更加估唔到,喺全球嚇到腳仔軟軟之後,「主人家」反而處變不驚,美匯、金價、油價、股市「虛驚」一場之後全部回穩,南韓同台灣更加倒升,本地魚缸跌幅曾經縮窄到得幾十點,收市稍多於200點,成交回升到1,179億元。

加息咁大件事都動搖唔到個股市,勢令班好友信心更加爆棚,今日祖國會公布CPI等重要經濟數據,但祖國已預早加息,所以變咗冇乜好驚。

今次人行加息,活期存款免加,5年定期加0.6厘,2年同3年定期息率分別高達3.25厘同3.85厘,比起同期發行嘅人債更有吸引力。如果存3年或5年定期就可避免負利率嘅出現(假設九月通脹係3.7%),但世事難料,有專家話只加一次息冇乜作用,要加多幾次至可以解決負利率。

如果祖國踏入加息周期,孖屐反應都算冷靜,以前好多例子係加息反而股市多數會升,原因係加息通常代表經濟好,雖然祖國今次加息主要目的亦係打通脹,但今次背景係半滯脹。至於會係防止泡沫抑或加速熱錢殺到好難講,人仔尋日未見其升先見其跌,開波即跌200點子,其後收復失地,美金亦見回軟。

但可以肯定嘅係,祖國樓市見到加息仲驚過「國十條」同「加強版」,所以內房股尋日亦最傷,保險股升亦好正常,「食息一族」總算守得雲開,並帶挈埋招緊股嘅友邦(01299)。其實喺通脹周期同保險股嘅關係好複雜,古勝強調未來環境係「半滯脹」:經濟增長慢、債券孳息率低、資產見泡沫,保險客戶可能會對保單回報低過通脹唔滿意,甚至可能退保搵更高回報投資。

總之,中國加息其實係迫不得已,見到棉花、玉米、糖、大豆期貨價格可以一個禮拜狂升超過一成,個社會想唔亂都幾難,正如「白頭任」話係百年不遇嘅混亂情況,澆盤冷水淋一淋都好。

祖國錢莊股雖然及唔上保險股,但4升4跌亦算唔錯,今次係不對稱加息,所以對各間錢莊嘅影響性都唔同,高盛話會對貸存比率高、有較多短債同活期存款嘅細錢莊有利,包括中信行(00998)、工行(01398)同民行(01988),美銀睇好細錢莊嘅招行(03968)同中信行,蘇皇啱啱將建行(00939)嘅評級由持有調高至買入,瑞銀則睇好招行同交行(03328),摩通亦話對整體祖國錢莊股有利,所謂「各花入各眼」。

古勝就比較鍾意民行,7蚊支持力幾強,往績PE約12倍勝在夠平,今年上半年賺多約兩成。民行借錢一向較為進取,所以前排畀中銀監要求佢提高存款準備金率半個百分點,但政策實施只係兩個月,實際影響其實好細。如果求穩陣,可以等7蚊樓下至入貨。