家長一向對名牌直資學校趨之若鶩，不惜千辛萬苦都希望子女考進去。誰知道直資學校唔聲唔聲，經審計署一揭發，真如「紙紮老虎——嚇死人」，而且愈是名牌愈是混帳，又買股又玩基金，又亂借錢又亂入帳，唔好話理都理唔掂，根本睇都睇唔清。
有些直資學校更完全當教育局冇到，又當廉政公署唔存在。不是嗎？有直資學校竟斗膽違規收受食物部及飯盒供應商捐款，這已不只是行政疏忽，更牽涉非法利益關係，看來當局不能不認真對待。
港府於上世紀九十年代起推行直資計劃，原意是賦予其較大彈性，體制更趨多元化，為學生提供更多選擇。十多年下來，欠缺監管，直如唐朝之「藩鎮割據」：任其坐大，一如土皇帝，當教育局死嘅，違規事項多如天上繁星，根本不能一一去數清楚。
冰凍三尺非一日之寒。全港千多間中小學，其中僅有七十二間直資學校，然教育當局竟任其亂舞，許多規矩形同虛設，如此放縱直資學校，唔出事就真係冇天理。先一排當局不斷呼籲官立及津貼中學參與自願減班計劃，以紓減殺校及多出來的超額教師，卻從來沒有提過要直資學校參加，當局厚此薄彼，昭昭明甚。何以教育當局奉其若神明？
近來教育改革朝令夕改，單是教學語言就折騰了好一段日子，是否在教學語言上調來調去，教學質素就調高了？看來只是令教師、家長、學生都無所適從而已；而真正要管的直資學校，其一匹布咁長之混帳如非審計署踢爆，則其「隱性劣行」恐怕會一直混吉下去。